فيما يلي البرنامج اليومي لطالب مشحّر في بلاد الغربة:

1-    الفيقة على صوت التريليون منبه حولي و حواليي (حواليي مو حوالبي)
2-    التطبيس فوق الفرشة وصولاّ للحمام لزوم عدم الإحراج لاحقاً
3-    دك الكثير من الأواعي تحسباَ للبرد يلي بيقص البسمار و الزلم (بس أخدلي حقي من الناموس هالبرد والله)
4-    كب (و ليس شوطحة) كيس الزبالة تبع قبل بيوم بحاوية الزبالة المخصصة للزبائل العضوية (ستيريوتايبنغ للزبايل)
5-    التأكد إني لابس منطروني (مع إنو الأوروبيون الغشيمين هون بيقولو بنطلون مدري ليش)
6-    التصبيح على كافة العالم المبحوتة بالشارع يلي مؤلفين من السكرانين, الهيبيين, و الطلاب المرعوبين
7-    التجأجؤ اللئيم بالمطر يلي بيوصل عالأواعي الداخلية و المصران الأعور
8-    أخذ زاوية لتغيير الأواعي و من ثم إيجاد باص يلي بيشحطني إلى الجامعة
9-    الوصول بالسلامة إلى الجامعة بعد جأجأة تانية عالطريق بينها و بين الباص
10-    أكل كافة أنواع البهادل على اعتبار إني أطرش بالزفة و كبش الفدا
11-    شلح كافة الأواعي الممكن شلحها بفترة الضهيرة لأنو الشمس بتبلش ترئع
12-    بداية النق إنو بدي آكل
13-    الذهاب إلى كافتيريا الجامعة التي تبعد فشخة حجر قطره حوالي ال 3 كيلو متر
14-    تزهرم الجلاعيص الفرنسية مع الأصدقاء و عدم التمتع.
15-    بداية النق إني أكلت كتير
16-    العودة للنوم بالصف بحجة إنو البروفسور عم يحكي بسرعة و ما عم إفهم شي
17-    التجأجؤ اللئيم على طريق العودة و الوصول إلى البيت مسرورين بعد ساعتين من الترحال
18-    الاستمتاع لأنغام الجعير تبع سكان الحارة بأثناء الطبخ و النفخ و تعباية كيس جديد من الزبائل العضوية
19-    الالتحاش متل أبو عرفة ناح الكمبيوتر بهدف كمش أي حدا أونلاين و النق عليه أو عليها
20-    الإندفاس تحضيراً ليوم جديد

صدر و أفهم علناً